قصة كوميدية
يكتبها : حسام الدين فكري
1/5/2019 : في مساء حار بحي
"حدائق القبة" في القاهرة، الشاب "سيد فوزي" يتوقف لدى أحد
أكشاك السجائر؛ ليشتري علبة سجائره المفضلة. يدفع بالنقود إلى البائع، فيحصيها ثم
يستخرج من بينها ورقة من فئة الجنيهات الخمسة ويعيدها إليه...
_ مالها دي؟!
_ مش هتمشي معايا..هات واحدة غيرها
_ ليه؟
_ دي دايبة ومقطوعة نصين وملزوقة "بالسلوتيب"..واللزق طالع منها
كمان!
_ مفيش فكة تاني..يا إما تاخد بقى ورقة بمتين جنيه
يحسبها البائع في عقله بسرعة، أن يقبل هذه الورقة المهترئة ويحاول أن
يفرضها على عميل آخر، أفضل من أن يستنفذ الأوراق المالية ذات الفئات الصغيرة، التي
سيحتاج إليها مع عملاء آخرين، فيقبلها على مضض.
2/5/2019 : ضجة هائلة في قلب
"سوق العبور" بطريق القاهرة – الإسماعيلية الصحراوي..يقترب أحد الأشخاص
من حلقة "المتفرجين"، التي يتوسطها شخصان يتراشقان بكلمات حادة، وقد
أمسك كل منهما بتلابيب الآخر..يسأل أحد الواقفين :
_ هو فيه إيه؟!
_ مش هتصدّق..الخناقة دي كلها على خمسة جنيه!
ثم يحكي له أن رجلاً اشترى بعض الفاكهة من أحد البائعين، وحينما أعطاه
حسابه، أعاد له البائع ورقة ذات خمسة جنيهات وطالبه بغيرها، فرفض الرجل وأصر أنه
لايملك سواها!.
في أصيل ذلك اليوم، سافر "سيد فوزي" إلى الأسكندرية، لقضاء يومين
برفقة أحد أصدقائه في شقته بعروس البحر المتوسط.
3/5/2019 : في مدينة
"المنصورة"..السيدة "أنيسة السعيد" (ربة منزل) تستقل سيارة
"السيرفيس" التي تتحرك داخل المدينة..تعطي السائق خمسة جنيهات ليأخذ
منها أجرته، فيعيدها إليها متذمراً، بدعوى أنها قديمة ومُلصقة...
_ معلش يا ابني..مفيش غيرها معايا..إبقى اديها للبنزينة
فيردّ عليها السائق متهكماً:
_ كان زمان ياحاجة..دلوقتي بياخدوا الفلوس القديمة بالعافية
ثم يستطرد قائلاً:
_ لو مفيش غيرها معاكي..ولا يهمك..خليها علينا خالص
ويصرّ السائق على رفض "الخمسة جنيه" فتظل مع السيدة، التي تمنحه
جنيهاً واحداً كأجرة، بعد أن تنازل عن الجنيه الثاني، من أجرته المحددة بجنيهين!.
4/5/2019 : في مطعم شهير بمنطقة
"الداون تاون" في بداية طريق الأسكندرية – القاهرة الصحراوي..الشاب
"سيد فوزي" يدفع حساب السمك والجمبري وشوربة "السي فوود" التي
تناولها هو وصديقه الإسكندراني.."الكاشير" يدفع إليه بباقي نقوده فيكتشف
"الخمسة جنيه" إياها من بينها..يقول لصديقه مندهشاً:
_ الخمسة جنيه القديمة دي نفسها..كانت معايا من يومين!
_ يمكن شبهها..ماهي الفلوس القديمة كتير
_ عليّا النعمة هيه..حتى بأمارة "السلوتيب" اللي طالع منها ده
يطلب من الكاشير واحدة أخرى بدلاً منها، فيقول له:
_ مفيش فكة غيرها دلوقتي..يا إما تستنى معايا شوية..لغاية ماتيجي فكة تانيه
_ لا..أستنى إيه..ده أنا يادوبك ألحق القطر..أصل آخر قطر من اسكندرية
للقاهرة بيطلع الساعة تمانيه بالليل..لو فاتني هضطر أستنى للساعة اتنين الصبح..لما
ييجي القطر اللي بعده..هاتها بقى وخلاص..أمري لله
ينطلق إلى محطة القطار، موظف شباك التذاكر يتناولها منه فلا تروق له
ويعيدها إليه...
_ معلش ياباشا..أكيد هتعرف تشوف لها تصريفة!
_ والله يا أستاذ لما بنيجي نوّرد الفلوس..مابيرضوش ياخدوا مننا الفلوس
المقطوعة دي..طب ماهي جاية من الزباين..مش جايبنها يعني من بيوتنا..إنما تقول لمين
بقى..على طول إحنا في الموّال ده..هاتها ياسيدي..أمري لله
_ أشكرك..ربنا يخلّيك..بس من فضلك لو معاك ورقة وقلم
يقوم بتدوين الأرقام المطبوعة على الورقة المالية، وهو يوضّح للرجل:
_ أنا أصلي قابلتها كذا مرة..كده بقى لو قابلتها تاني..هعرفها على طول!!
5/5/2019 : تتجه الطالبة الجامعية
"سوسن رشيد" نحو سيارتها التي أوقفتها بأحد الشوارع الرئيسية في مدينة
"دمياط الجديدة"..تلتقط ميدالية مفاتيحها من جيبها، فيما يقترب
"السايس" منها..تقفز في سيارتها فيظل يوجهها حتى تعدل سيارتها على
الطريق..فتدفع إليه بخمسة جنيهات كاملة يتناولها منها شاكراً..ينظر إلى الورقة
النقدية بعد أن تنصرف فيكتشف أنها قديمة ومُلصقة، يتأملها مُحنقاً بضع لحظات، ثم
لايلبث أن يضعها على جبهته وهو يحمد الله على مارزقه!.
6/5/2019 : مقهى "السلام"
بمدينة "أخميم" في محافظة "سوهاج"..الأستاذ "وائل
شاكر" مدرس اللغة الإنجليزية يدفع حساب المشروبات التي تناولها..صبي المقهى
يلتقط ورقة "الخمسة جنيه" القديمة التي أعطاها له...
_ شوفلنا واحدة تانية يا "مستر"!
_ ليه..مالها؟!
_ دي دايبة ومقطوعة نصين وملزوقة..عارف البقعة البنية اللي عليها دي من
إيه..ده واحد "ضرّيب" كان بيسيّح عليها حتة حشيش!
_ يعني هو يضرب عليها حشيش..وأنا معرفش أصرفها!!
يستعيدها الأستاذ "وائل" منه ويمنحه واحدة "سليمة"
بدلاً عنها..ثم يسير في طريقه عائداً إلى منزله، فيجد متسولاً قد افترش الرصيف إلى
جوار عمود إنارة..يقرر أن يعطيها له، فيُغرقه الرجل بسيل من الدعوات الحارة..يقول
لنفسه : " الحمد لله..خلصت منها..وأخدت بيها ثواب كمان"!.
7/5/2019 : أمام كشك السجائر ذاته
بمنطقة "حدائق القبة" بالقاهرة..يتوقف "سيد فوزي" ليشتري علبة
سجائره..يُحصي البائع النقود التي منحها له، ثم يستخرج "خمسة جنيه" من
بينها...
_ أنا أخدت منك الخمسة جنيه دي نفسها..من حوالي أسبوع..رجعتلك تاني إزاي؟!
يُدّقق "سيد فوزي" النظر فيها، ثم يُخرج من جيبه الورقة التي
دوّن فيها أرقامها من قبل...
_ هيه فعلاً..بس ماكنتش فيها البقعة البنية دي..لا..كده كتير أوي..دي شكلها
لازقالي بقى!!
يهّم بتمزيقها كي يتخلص منها، فيستوقفه البائع:
_ إنت هتعمل إيه..حرام ياجدع..دي برضه فلوس
_ طب ماتاخدها وانت ساكت..طالما هي فلوس!
_ خلاص هاتها
_ لا ياعم..وانت ذنبك إيه..أقولك..جاتلي فكرة أحسن..أنا هشيلها في
محفظتي..علشان ملاقيهاش طلعالي تاني!
يدسّها "سيد فوزي" في حافظة نقوده، فتتحول إلى "قدم
السعد" عليه، وتجلب له كثيراً من شقيقاتها ذوات الفئات الكبيرة..حتى صار يبدأ
يومه – من قبيل التفاؤل – بإلقاء "تحية الصباح" عليها كل يوم!.
**
أذكر كم مرة تكرر اسم "سيد فوزي" في هذه الحكاية..واحصل على
جائزة قيمة.."خمسة جنيه"..بس جديدة!!.
تعليقات
إرسال تعليق