حسام الدين فكري...
هو : إزيك يا حبيبتي
هي : نايس..إنت عامل إيه من غيري ؟!
هو : أنا تمام..زي الفل..آخر حلاوة !
هي : يا سلام..بقى كده..يعني ماوحشتكش ؟!
هو : لا طبعاً وحشتيني
هي : وعملت إيه في اليومين اللي غبتهم عنك ؟!
هو : كنت بفكر فيكي ليل نهار
هي : كنت بتفكر إزاي ؟!
هو : إيه الغباء ده..كنت بفكر..مش عارفة يعني إيه واحد يفكر في واحدة
بيحبها !
هي : لأ عارفة..بس عايزاك انت تشرحلي
هو : يعني كنت...
هي (تقاطعه) : استنى بس..أنا عايزاك تشرحلي بالتفصيل الممل
هو : طيب..يعني أنا كنت...
هي (تقاطعه) : إوعى تسيب حاجة..اعملي (Spot) كده على كل ثانية..وكل لحظة
هو : ماشي يا روحي..شوفي بقى...
هي (تقاطعه) : أنا عايزة أكون كأني كنت معاك بالظبط !
هو : إيه الملل ده !..ماتصبري شوية..إديني فرصة أفتح بؤي..وللا أشرحلك
بالإشارات ؟!!
هي : اتفضل يا حبيبي..المايك معاك !
هو : يعني إيه (المايك معاك)..هوه أنا هغني وللا إيه..أنا شامم ريحة سخرية
كده مش عاجباني !!
هي : لا سخرية ولا حاجة..أنا عايزة أديك فرصتك كاملة..جو ماي دارلنج..جو !
هو : أوكي..يعني أنا بقى كنت أقعد في البلكونة..وأشوف القمر منور في
السما...
هي (تقاطعه) : وعلى طول آجي على بالك..وتقول لنفسك : فينك يا حبيبتي..ياللي
منورة حياتي..
مش كده ؟!!
هو : أيوه طبعاً !
هي (تواصل) : وتشوفني لابسة فستان فضي..مغزول بخيوط القمر..وباين عليا
مبسوطة وطايرة من الفرحة..وكنت بشاورلك من فوق وأقولك : تعالى يا حبيبي..مش كده ؟!
هو : أيوه صح !
هي : طيب وانت جيت وللا لأ ؟!
هو : طبعاً جيت..في لمح البصر !
هي : وكنت لابس إيه ؟!
هو : عفريتة !!
هي : عفريتة !..يعني إيه ؟!
هو : اللي بيلبسوها العمال دي !
هي : يا سلام !..يعني أنا متشيكة ولابسة فستان يجنن..وانت جايلي لابس
عفريتة..إزاي يعني !!
هو : هوه كده !
هي : كده إزاي..إنت بتهزر..وللا قصدك إن أنا اللي عفريتة ؟!!
هو : أكيد بهزر !..هوه أنا أقدر أقول عليكي كده..ده إنتي ملاكي ونوري وعمري
!
هي : أيوه كده اتعدل..وقوللي بقى كنت لابس إيه ؟!
هو : بدلة أبيض في أبيض..كانت حاجة ترى شيك !
هي : شيك إيه يابني..إنت كنت واقع في كوباية لبن !..ماهو أنا لابسة
فضي..يبقى إنت تلبس لون
يعمل (Harmony) معايا..أي
حاجة غير الأبيض ده !!
هو : طيب سيبك..اعتبريها أي لون يعجبك..ماتضيعيش بقى اللحظة الرومانسية دي
!
هي : ماشي يا سيدي..وانت لما جيت بقى عملنا إيه ؟!
هو : أنا روحت ماسك إيديكي..وبصيت في عينيكي..وقعدنا نحلم بقى بعشنا
الصغير..وعيالنا اللي هنجيبهم..إنتي قلتي تلاتة..وأنا قلت خمسة !!
هي :مش مهم كام دلوقتي !..تعالى هنا..هوه انت كنت طالعلي فوق على القمر
بإيدك فاضية..مافيش
خاتم ولا غويشة..ولا حتى وردة بلدي !!
هو : لأ إزاي..كان فيه طبعاً !
هي : ولما هوه كان فيه..الحتة دي بقى راحت فين..طارت في المونتاج وللا إيه
؟!!
هو : لأ..أنا بس نسيت !
هي : نسيت !..وإزاي تنسى..إنت مش عارف إننا بنحب الحاجات دي !
هو (بصوت خافت) : أيوه..كلكم كده..لازم تدبسونا في أي حاجة !!
هي : إنت بتقول إيه ؟!
هو : ولا حاجة !..المهم ياروحي..أنا بقى كنت جايبلك غويشة دهب بتلمع..كانت
هتاكل من إيدك حتة !
هي : وبعدين عملت إيه ؟!
هو : مافيش..أنا بقى قدمتهالك..وانتي شكرتيني !
هي : شكرتك !..يعني إيه..هوه انت قدمتهالي كده من غير ولا كلمة..ولا حتى
كان فيه موسيقى
رومانتك في ال (Background) ؟!
هو : لأ إزاي..كان في موسيقى هادية روعة..وأنا قلتلك كلمتين كده بكل مشاعري
وعواطفي الجياشة !!
هي : الجياشة !..ده انت قديم أوي..ماشي..وقلت إيه بقى بسلامتك ؟!
هو : قلتلك : ده عربون حبي الكبير..يا أحلى واحدة في الكون !
هي : كلام عادي..مافيهوش أي إبداع !
هو : لأ..ما أنا قلت كلام تاني معاه !
هي : زي إيه كده ؟!
هو : قلتلك كمان : أنا من غيرك ولا حاجة..إنتي روحي وقلبي..إنتي شمسي اللي
منورة أيامي !
هي : برضه كلام عادي !..بقولك إيه..أنا كده اتخنقت..لو سمحت بقى نزلني !
هو : ماليش دعوة !
هي : مش إنت اللي طلعتني فوق..يبقى إنت اللي تنزلني !
هو : شوفتي بقى إنك محتاجالي !
هي : ولا محتاجالك ولا حاجة..ولو عايزة أنزل..هنزل !
هو : براحتك..إنزلي بقى لوحدك !
... وما زال الجدال مستمراً !! .
تعليقات
إرسال تعليق