حسام الدين فكري...
( كتبت هذا المقال مع بداية جلسات البرلمان المصري الجديد ) .
( كتبت هذا المقال مع بداية جلسات البرلمان المصري الجديد ) .
قال لي صديقي ساخراً : شُفت الأشكال اللي في البرطمان الجديد..دول هيخلونا
يا أخي نفطس من الضحك !!.
فقلت له جاداً : إنت تستحق "تلبس" برلمان زي ده ! .
فاعترض قائلاً " ليه يعني ؟! .
فقلت له : لأنك عشت في الدور وقلت أنا مقاطع الإنتخابات..نمت
واتغطيت..تنازلت عن صوتك بمحض إرادتك..لكن آخرون ذهبوا ووضعوا أصواتهم..فاختاروا
بالنيابة عنك !! .
قال صديقي : ما هو المعروض كله..ماكنش فيه حاجة كويسة ! .
فاعترضت أنا : هو إنت بتنقي طماطم !!..وبعدين مين قال كده..يعني لما تكون
الدائرة الواحدة فيها أكثر من خمسين مرشح..مش ممكن ماتلاقيش واحد أو اتنين
يعجبوك..وإلا يبقى الشعب كله مش عاجبك !! .
قال : لا..أنا ماقلتش كده..بس كنت عايز حاجة معينة ومالقيتهاش ! .
قلت : حاجة إيه..تفصيل يعني..على مقاسك ؟! .
قال : تقدر تقول كده ! .
قلت : إنت كده بتهزر !..ماهو لو كل ناخب هيختار مرشح على مزاجه
بالظبط..يبقى ماحدش هيختار مرشح أبداً..أو ترشح إنت نفسك وتريحنا !! .
قال : يعني إنت عاجبك اللي كسبوا دول ؟! .
قلت بسرعة : طبعاً لا..كنت أحب يبقى عندنا مجلس أحسن من كده..لكن إنت
وأمثالك السبب..قعدتم في بيوتكم..واللي نزلوا انتخبولنا كلنا المجلس العجيب ده ! .
قال كأنه يقرر حقيقة : ما هي أصلها مابقتش بلدنا ! .
قلت ساخراً : أمال بلد مين ؟!..إطلع من دماغي وبلاش العبارات اللي
"كوبي وبيست" دي..إنت عامل زي مذيع النشرة..بتقرأ دون أن تفهم..ولو فكرت
شوية هتلاقينا كلنا في مركب واحدة ! .
قال : لا..إحنا مش معاكم ! .
قلت : مين أنتم ؟! .
قال : إحنا اللي عايزينها تبقى فوق الجميع ! .
فعدت إلى سخريتي : فوق مين يعني ؟!..أهو ده كلام سفيه ليس له أي معنى..كأنك
تقول إننا نحن نريدها تحت الجميع..اعقل بقى ! .
قال مجادلاً : تركنا لكم العقل كله..لما نشوف بقى هتعملوا إيه ؟! .
فقلت له : يا صديقي دي بلدنا كلنا..ولازم كلنا نتعاون مع بعض ! .
فقال لي : لا..نحن لن نشارك في شيء ! .
هنا كدت أخلع فردة حذائي وأطوحها في وجهه !..ثم تراجعت وقلت له بهدوء :
بقولك إيه..بلاش كلام في السياسة أحسن ! .
فقال لي : أنا بقول كده برضه ! .
...وسرنا نضحك معاً..كأننا لم نتناقش في شيء..منذ لحظات قليلة !! .
تعليقات
إرسال تعليق