حسام الدين فكري...
أحياناً من كثرة بلبعة "مياه الحنفية"، وشم
الهواء الملوث وسماع أنكر الأصوات من حولك، أحياناً يعني، تشك إنت فين بالضبط، هو
انت في مصر فعلاً وللا بلد تانية ؟!..وعلشان أساعدك وأعيد لك توازنك، أو بصراحة
بقى أفكرك باللي مش عايز تفتكره من نفسك !..سوف أدلك على شوية علامات كده، لو
لقيتها يابرنس تبقى في مصر..ولو مالقيتهاش- يابن المحظوظة !- تبقى مش عندنا..اسمك
مش في كشف الغلابة اللي هنا !! .
شوف يا سيدي..لو إنت في مصر..هتلاقي الحاجات دي :
-
تخرج الصبح بدري..فتسمع الراديو بيذيع أغنية "يا صباح
الخير ياللي معانا" لأم كلثوم ! .
-
وانت رايح شغلك تشوف شباب ورجالة كتير..مرصوصين أمام
عربيات الفول ! .
-
تركب الأوتوبيس تلاقي الكمساري بيقول : "اتحرك يا
أستاذ..الأوتوبيس فاضي جوه" ! .
-
في الأوتوبيس تلاقي واحد على الأقل يصرخ : "الحقوني
يا ناس..محفظتي اتسرقت" !! .
-
في الأوتوبيس برضه..لازم يعدي عليك بياعين العسلية
والملبن والأمشاط والفلايات..وشحاتين على كل شكل ولون !! .
-
في الأوتوبيس كمان..تقدر تعرف بالضبط..إحساس التونة داخل
العلبة المقفولة !! .
-
ولأن الأوتوبيس على طول مليان على آخره..فالوسيلة
الوحيدة للنزول منه..أن تتحرك "بالقصور الذاتي" !! .
-
لو نزلت واقف على رجليك، يبقى تحمد ربنا..ولو اتكعورت
وانت نازل، يبقى ربنا يستر عليك ! .
-
أما لو ركبت ميكروباص أو توكتوك..فلازم تسمع
إجباري..أغاني "مهرجانات" هابطة..ماتعرفش مين بيغنيها أساساً ! .
-
في مترو الأنفاق..تلاقي واحد أو أكثر..مستعبطين وطالعين
عربية السيدات !! .
-
لما توصل الشغل..زميلك أول مايشوفك يسألك : "هاه
يابوحميد..هتدخل معانا الجمعية" ؟!! .
-
واحد زميلك تاني، يميل عليك وهو يهمس : "عرفت آخر
الأخبار" ؟! .
-
لو انت شغال في الحكومة..هتشوف زميل تالت بيمضي معاك في
دفتر الحضور..ومش هتشوفه طول اليوم..ماتقلقش..هيخلص السبوبة ويظهر عند التوقيع في
دفتر الإنصراف !! .
-
تلاقي صوان الفرح..وبعد خطوتين صوان العزاء ! .
-
تشوف أكوام الزبالة منورة كل الشوارع والحارات..وعلى
ضفاف النيل !.
-
تسمع تصريحات المسئولين..وبعد كام شهر..تسمع نفس
التصريحات تاني..ماهو مافيش حاجة اتغيرت !! .
-
طول ما انت ماشي..تلاقي البنات بيتكلموا في
الموبايل..تحت الحجاب !! .
-
تشوف الشباب من الصبح والظهر لغاية المغرب
والعشا..بيلعبوا طاولة على القهاوي !! .
-
وتشوف شباب تانيين..بيرقصوا بالمطاوي..على كوبري قصر
النيل !! .
-
وعلى نفس الكوبري كمان..تلاقي كل الأحبة..اتنين اتنين !!
.
-
وتنزل بقى على كورنيش النيل..تلاقي بياعين السميط والفل
وحمص الشام..تصدق بيبقى سخن ومشطشط ويجنن !! .
-
تروح أي مصلحة حكومية..فتدفع الرشوة الأول..وبعدين
يشوفوا إنت عايز إيه !! .
-
واحد يقولك: الشاي يابيه..وواحد تاني يقولك : الحلاوة يا
باشا..والناصح فيهم بقى..تلاقيه فاتح الدرج..لاستقبال "الإكراميات"..من
غير ولا كلمة !! .
-
في المصلحة الحكومية برضه..لو لقيت 3 موظفين على
مكاتبهم..اضرب تعظيم سلام للجدعان !! .
-
تدخل أي مدرسة حكومية..فتلاقي حصة الألعاب شغالة في
الحوش على طول..وماتعرفش أبداً الحصص التانية معادها إمتى !!.
-
في شوارع المحروسة..تسمع كلاكسات العربيات والأوتوبيسات
والميكروباصات..طول اليوم ! .
-
تشوف كوبري 6 أكتوبر ومحور 26 يوليو على طول زحمة..وكمان
الشوارع الرهيبة : صلاح سالم، جسر السويس، فيصل، السودان، أحمد عرابي.. وعين شمس
!! .
-
تقدر تمشي بعربيتك عكسي في أي طريق..ولو جالك
عسكري..تكمرله خمسين جنيه في إيده..وتكمل طريقك عادي !! .
-
تركن عربيتك في الشارع..فيتخلق جنبها "سايس"
على طول..ولازم تدفعله حاجة قبل ماتمشي ! .
-
لو هناك حفرة في الأسفلت..تقعد رايح جاي عليها ست
شهور..عقبال ما حد يفكر يعملها ! .
-
تبقى بطل الأبطال..لو عرفت تشوف "الحدود
الفاصلة"..بين الشارع والرصيف !! .
-
في أي إشارة مرور..لازم تلاقي شحاتين..وبياعين مناديل
وعسلية !.
-
تحت أي كوبري تشم رائحة نفاذة جداً..بسبب إنتاج
المواطنين الغزير !! .
-
في أي دورة مياة عامة..لازم تدفع جنيه قبل أن يسمحوا
لك..بأن تقضي حاجتك ! .
-
وحتى في المطاعم والفنادق..لو دخلت الحمام..تلاقي العامل
واقفلك بالمناديل..علشان تديله حاجة !! .
-
تشوف واحد بيفاصل في سعر قميص..وواحدة بتفاصل في سعر
"توكة" !! .
-
تفتح الجرايد الصفرا – ودي كتيرة جداً ! – فتلاقيها كلها
حكايات متفبركة عن السياسيين والفنانين والرياضيين ونجوم المجتمع..ومغامرات الجن
والعفاريت !! .
-
وتفتح أي قناة فضائية فتلاقيها سلسلة طويلة من
الإعلانات..تتخللها بعض المسلسلات والبرامج !! .
-
تشوف تترات المسلسلات مكتوب فيها : الفنان
القدير..والنجم المتميز..والممثل الخبير !..وتترات النهاية مافيهاش غير : فريق عمل
فلانة وعلانة وترتانة !! .
-
تسمع ممثلة بتقول : " أنا موافقة على مشاهد
العري..بس لو موظفة في الدراما " !! .
-
ورقاصة راجعة من الحج..طوالي على الكباريه !! .
-
تلاقي واحد على الفيس شغال ينزل أغاني وفيديوهات..ولما
يدن الفجر يروح منزّل : " قوموا إلى صلاتكم..يرحمكم الله " !! .
-
وجماعة كمان على الفيس..شغالين يتخانقوا وهاريين بعض Comments ..على Post منزله
واحد..ماحدش فيهم يعرفه !! .
-
تلاقي كل مطرب أو ممثل..ماشي معاه اتنين بودي جارد !! .
-
تلاقي الفيلم الجديد..في أول يوم عرض..متصور من
السينما..ونازل على YouTube ! .
-
وعلى اليوتيوب كمان..تلاقي فيديوهات مكتوب عليها
:"شاهد فضيحة الفنانة فلانة"..وتشغل الفيديو يطلع توم وجيري !! .
-
تسمع إن عدد من الفنانين..زعلانين من بعض بسبب
السياسة..ولما يتكلموا..تكتشف إن مافيش فيهم واحد..فاهم في السياسة أساساً !! .
-
تشوف واحدة بتعيط لأن ابنها الصغير تايه..وأول ماتشوفه
تضربه على طول ! .
-
لو طلبت أي Call
Center ..لازم
يلطعوك خمس دقائق على الأقل..عقبال ماتلاقي حد يعبرك ! .
-
واللي يغيظك بقى..لما تطلب الساعة تلاتة الصبح..ويقولك :
" جميع مندوبينا الآن مشغولين بالرد على عملاء آخرين " !..يا ولاد
الكدابة..مين بيكلمكم أصلاً في الوقت ده ؟!! .
-
ييجي عمال الغاز يحفروا أمام بيتك..فيركبوا المواسير
ويردموا..وبعد كام أسبوع ييجي عمال الكهرباء، ويحفروا في نفس المكان..فيركبوا
الكابلات ويردموا..طيب ماهي كانت مفتوحة أساساً ياجماعة !! .
-
لو مصنع خشب ولَّع..تيجي المطافي بعدها بساعتين..وطبعاً
المصنع ساعتها بيكون..راااح !! .
-
لومنتخب الكورة فاز ببطولة أفريقيا..تفضل البلد كلها
تحتفل أسبوع..ولو منتخب الإسكواش طلع أول العالم..ماحدش في مصر يعرف حاجة !! .
-
لاعب منتخب الكورة يأخذ مكافأة البطولة 100 ألف
جنيه..إنما بطل العالم في رفع الأثقال..يأخذ مكافأة خمسميت جنيه..وأحياناً شهادة
تقدير وبس !! .
-
ماتسمعش اسم أي عالم مصري..إلا إذا حصل على جائزة
نوبل..إنما طوال الوقت تسمع أسماء لعيبة الأهلي والزمالك..وممثلين درجة تانية !! .
هاه..طمّني..لقيت إيه..يووووه..أهو ده اللي توقعته
برضه..طلعت معانا في مصر يا برنس !! .
تعليقات
إرسال تعليق